तुझा साबण स्लो आहे का

काही ठराविक वेळी ठराविक प्रसंग आपोआप आठवतातच.. जसे फेसबुकवर काही वर्षांपूर्वी आजच्या तारखेला आपण काय काय पोस्ट केलं हे मेमरी मध्ये दाखवतात, तश्या आपल्या काही मेमऱ्या कुठल्याही अँपशिवाय आपोआप त्या त्या दिवशी आठवतात.. अशीच एक मेमरी, बहुतेक 5-6 वर्षांपूर्वी---

मी घरात निवांत काहीतरी करत, कॉम्प्युटरच्या समोर बसून टाईमपास करत होते.. दुपारच्या जेवायची वेळ होत आली होती.. आईची पण सगळी कामं आटपून ती पण वाचन वगैरे करत असणार.. आता बाबा आले की जेवायला बसायचं.. म्हणून आम्ही बाबांची वाट बघत होतो..

नेहेमीप्रमाणे बारा वाजायच्या दरम्यान बाबा काम संपवून जेवायला घरी आले, त्यांच्या बरोबर त्यांचा एक मित्र होता.. म्हणजे आंजर्ल्याचाच एक मनुष्य.. बाबांच्याच वयाचा असेल, अगदी रोजच्या भेटण्यातला, पिढ्यानपिढ्या ओळखीच्या असलेल्या कुटुंबातला माणूस..

बाबा आणि तो काका दोघे आले, जरा इकडच्या तिकडच्या गप्पाटप्पा, किंवा वाटेत येताना त्यांचा जो काय विषय सुरु असेल ते बोलणं वगैरे झालं, मग तो म्हणाला की,"चल, निघतो मी"

त्यावर बाबा: "बस रे, चहा घेऊ घोटभर" (आमच्याकडे दिवसाच्या कुठल्याही वेळेला लोक चहा पितात, ते एक जाऊदेच😂)

तो काका: छे रे बाबा!! जेवायची वेळ झाली,, आता काही नको, वेळेवर जेवायला घरी पोचायला हवं.. आजी आजोबा वाट बघत असतील"

बाबा: हो हो, बरोबर आहे, बराय मग!

तो काका बाहेर पडून गेला, आम्ही जेवायला बसलो, आणि माझ्या डोक्यात भयंकर वेगाने विचारचक्र फिरायला लागली..

हा माणूस पन्नाशी उलटून गेलेला आहे, त्याचे आईवडील ऐशीच्या पुढे वयाचे आहेत, आणि ह्याचे आजी आजोबा जेवायला वाट बघतायत म्हणतो हा.. हे कोण आजी आजोबा आहेत ते आपल्याला इतक्या दिवसात कधीच कसे दिसले नाहीत??? आणि दुसरीकडे कुठे असतील तर मग त्यांचं वय तरी किती असेल😥😲🙆

विचार करून करून डोस्कं दमलं.. न राहवून बाबांना विचारलं की, "बाबा ह्या काकाच्या आजीआजोबांचं वय तरी काय असेल? नक्कीच 110 वर्षाच्या वर असणार"

बाबा तर माझ्याकडे असे विचित्रपणे बघायला लागले की मी अजूनच बुचकळ्यात...

मग एकदाचं शिरलं डोक्यात.. कि त्यादिवशी सर्वपित्री अमावस्या होती..साधारण कोणत्याही विशेष दिवशी, सणाला(हा सण नव्हे म्हणा!) सगळ्यांनी वेळेवर आणि एकत्र जेवावं हा साधारण संकेत..

ह्या दिवशी पूर्वज जेवायला येतात, असं म्हटलं जातं म्हणून तो गृहस्थ म्हणत होता की, "आजी आजोबा वाट बघत असतील!"

"आवरा!!" म्हणत अक्षरशः डोक्याला हात लावला मी फक्त😂😂😂

आणि ,"तुझा साबण स्लो आहे का?" अश्या नजरेनी घरातले सगळे माझ्याकडे बघायला लागले!

©ऐश्वर्या पेंडसे जोशी @मुर्डी/ @पंचनदी