कासव

अण्णा गोगटे नावाचा माणूस निवडणुकीला उभा राहून वारंवार 'पडतो'--- म्हणून पोहोरा विहिरीत 'पडला' तरी "पोहोऱ्याचा अण्णु झाला काय रे" असं म्हणणाऱ्या अंतू बरव्याच्या जिल्ह्यातले असल्यामुळे, असले शब्दप्रयोग तयार करणे आणि वापरणे हे आमचे कर्तव्य आहेच आहे!!!

नुकतीच उन्हाळ्याची चाहूल लागत होती, कुयरीची भाजी खुपवेळा खाऊन झाली पण पिक्क्या फणसाना अजून अवकाश होता. अश्या वेळी मिळालेल्या एकुलत्या एका पहिल्या फणसाची पण अपूर्वाई असते. बरं एकच फणस- तो सगळ्या दुनियेला वाटण्याइतका नव्हता. एका काकूने लाडक्या पुतण्याला आवडतात म्हणून थोडे गरे केळीच्या पानात गुंडाळून त्याला घरी न्यायला दिले.
"अरे व्वा! फणस! झाला पण एवढ्यात?? वा वा वा! पण आता एक कापडी पिशवी पण दे, कारण रस्त्याने येणारे जाणारे उगीच विचारत बसतील कि ह्यात काय आहे म्हणून"

(आपल्याकडे दुसऱ्यांच्या भानगडीत नाक खुपसायची हौस अतोनात) असो!

ती काकू पिशवी आणायला घरात वळते, तोच पुतण्या म्हणतो- "नको नाहीतर, नेतो असेच.. कुणी विचारलंच कि " काय आहे रे ते हातात तुझ्या?"  तर मग मी "कासव" असं उत्तर देईन.
बुचकळ्यात पडलेला समोरचा माणूस त्यातून बाहेर येईस्तो मी पुढे सरकलेलो असेन"

थोडक्यात काय तर जेव्हा भोचक प्रश्नावर उत्तर शोधत बसायच्या ऐवजी "तुला काय करायचंय??" हा प्रतिप्रश्न विचारायचा मोह होतो पण तसं करता येत नसल्याने असंबद्ध किंवा थातुरमातुर उत्तर देणे- ह्या प्रकाराला "कासव" असं नाव पाडून आम्ही मोकळे झालेलो आहोत.

असेच काही मजेशीर कासव प्रश्न आणि उत्तरे! प्रत्येक उत्तराच्या पुढे "तुला काय करायचंय" हे ध्रुवपद😉
"घरात तीन तीन बायका तुम्ही, तुळशीला पाणी कोण घालता मग?"
"ड्रीप बसवलंय"🌱

"एवढी जोरात मशीन चालवतेस्, मग ब्लाउजं तरी शिवायची ना?"
"शहरातल्या सारखे ₹450 + शिलाई देणार का, लगेच सुरु करते"

"तुला गाडी येते तरी सायकल का घेतली?"
"पेट्रोल परवडत नाही म्हणून!"

"शिकलेली असून जॉब का नाही करत?"
"माझ्या मदतीला एक मुलगी जॉब(😂) करते ना, तिचा जॉब जाऊ नये म्हणून"

"चालत कुठे फिरवतोस बायकोला? गाडी तरी काढायची?
(मुळात व्यायाम म्हणून चालण्यासाठी/धावण्यासाठी बाहेर पडल्यावर हा प्रश्न! त्यातून 'फिरवतोस' म्हणजे अगदी कुत्रा फिरवल्याचाच फील येतो😏)
"तिचा विश्वास नाही माझ्या ड्रायव्हिंगवर😂"

"नाव काय ठेवलस बायकोचं?"
(😠🙆 1857 साली लग्न झालेल्या बालिकावधूच्या काळातच अजून)
"नाही, तिनेच नाव बदललंय माझं"

"भावंड किती तुम्ही?"
"मी आणि एक भाऊ"
"बास? दोघेच?"
"नाही, अजून आहेत 8-10, जत्रेत हरवलेत लहानपणीच"

"सासूबाईंना काकू कसलं म्हणायचं ते?"
"काका कसं म्हणणार ना बाईमाणसाला?"

"एवढी शिकलेली मुलं तुम्ही, वेळ कसा जातो तुमचा खेडेगावात?
"गोट्या खेळतो रस्त्यावर!"

हि पोस्ट वाचून माझे बाबा नक्कीच म्हणणार नहेमीप्रमाणे-
"तुम्ही कशाला एवढा त्रास करून घेता? त्यांना हेच प्रश्न पडतात. नवीन राष्ट्रपती कोण झाले ह्यापेक्षा तुम्ही घरात काय करता ह्यातच त्यांना इंटरेस्ट आहे!!"

©ऐश्वर्या पेंडसे जोशी